نیسگیللی شعرلر (یونس کریمی)

دردیمی  آنلاتماغا  وئرمه دی  فورصت  منه

سوس دئدی،هئچ  سؤیله مه، ائتمه اذیّت منه

ایسته دیم هر لحظه من صحبت ائدم قویمادئ

ائتمه دی   حتی  نظر،  بیر کره   دقت   منه

وئرمیشیدی وصلینین  وعده سینی بیر زامان

اولدو   رقیبیمله  بیر ،  قالمادئ  قیمت   منه

اولدو  منیم  حاصیلیم   درد  و غم  جانگداز 

مسکن  اولوبدور کنون ، گوشۀ  خلوت  منه

یاخدئ منی شام کیمی ،یاندئم اونون عشقینه

قالدئ   اونون   حسرتی   دیلده   نهایت  منه

چکدیم اونون جورونو،قهرینی عؤمروم بویو

ظالم  او  غدّار  پری   اولمادئ  قیسمت  منه

هرکسی  قلبن  سئویب  ائیله دیم عادت  اونا

سوندا  وفاسئز چئخئب   قالدئ  مشقت  منه

قوربان اولوم شانسیما،قوربان اولوم بختیمه

ذرّه جه  یار  اولمادئ   مرغ   سعادت   منه

یونسم  عاشق لیگیم  دیللره  دستان  اولوب

خالق  یکتا !  اؤزون   ائیله   عینایت   منه

شام:شمع

یونس کریمی