نیسگیللی شعرلر (یونس کریمی)

 دولاندیم   دیدۀ ترلن   بوتون   دونیانی  مهری  جان!

سنی  تک  گؤرمدیم  امّا  گؤزه ل  جانانی  مهری جان!

سنیلن  باغلایان   پیمان  قیریلماز  تا  جانیم   واردیر

مگر قیرسین   "اجل   دستی"  بئله  پیمانی مهری جان!

سر کویونده  اؤلسم  ده  ملامت  ائیله مه  جانا!

یولوندا  سهل  و آساندیر وئرم  بو جانی  مهری جان!

بهشتین  وعده سین  سن سیز  منه  گر خالقیم  وئرسه

نه  حاجت ، نئینیرم  من  روضۀ  رضوانی  مهری جان!

گلیبدیر  زاره ، هیجروندن  منیم  دیوانه  بو کؤنلوم

گئجه – گوندوز فغان ائیلیر کی مهری هانی؟ مهری جان!

محبّت  باده  سیندن  تؤک  دویونجا ،  تشنه یم   تشنه

نوازش  ائیله  محتاجم   الون   قوربانی  مهری  جان!

سراب  زندگانیمده   منیم   فریادیمه    چاتدین

بَیَندون   یونسی  ؛ بیر سینه سی  سوزانی ؛ مهری جان!

یونس کریمی

بو شعری تمام وجودومونان تقدیم ائله ییرم جانیمدان عزیز خانیمیما؛

سیده مهری ائشیمه، گئجه لریمین آیینا،گوندوزلریمین گونشینه، بوتون

وارلیغیمین دلیلینه

بیلمیرم منیم کؤنلومون  قوشو     

اوچماق ایسته میر  یا کی بالی یوخ

یا قفس  سیخیب  قلبینی اونون     

لال اولوب  نه دن  قیل و قالی یوخ؟؟؟

هانسی   ظالیمین   قامچیسین  یئییب   

هانسی   ناکسین   اللری  اونو

تاپدامیش بئله ،  سوسدوروب  بوجور 

دورماق ایسته میر  شور و حالی یوخ

کیم  نه دن سالیب   زیندانا  اونو  

لئش کیمین   سورور هریانا اونو

بوغدولار یامان آل قانا اونو  

نئینه ییم   تکم   بیر  وفالی  یوخ

بیلمیرم  نه لر  گلدی  باشووه   

آی منیم   یازیق  پاسلانان  گولوم!!!

بیلمیرم   گوناهون  نه دور سنون  

دار آغاجیندان  آسلانان  گولوم!!!

دور آیاغا  قالخ  سؤیله  دردینی   

یاتما، اویما  ، دور،  قورو  کندینی

قیرگینان   جسارتله   بندینی   

غمده   قویلانان   یاسلانان   گولوم­!!!

یونس کریمی