غملی شعرلر
بیر داملا گؤز یاشی کیمی
گؤزلرونده دوغولایدیم
آخایدیم یاناقلاروندان
دوداغوندا داغیلایدیم
بیر داملا گؤز یاشی کیمی
گؤزلروندن سوزولَه یدیم
یاناغونون اوستونده شِئح
مونجوغو تک اَزیله یدیم
بیر داملا گؤز یاشی کیمی
گؤزلرونده دورولایدیم
سئوگیله_حسرتله اَنیب
بوغازونا ساریلایدیم
بیر داملا گؤز یاشی کیمی
گؤزلرونده دوغولایدیم
بیر داملا گؤز یاشی کیمی
گؤزلرونده بوغولایدیم
یونس کریمی
بولودلاردان ایلهام آلان گؤزلریم!
گؤل تک دولوب هی بوشالان گؤزلریم!
سونوندا تک - تنها قالان گؤزلریم!
سنله نَه لَر یاشامیشام دونیادا!!!
دنیز - دنیز دالغالانان گؤزلریم!
انتظاردان سؤنوب – یانان گؤزلریم!
هر یالانی دوز اینانان گؤزلریم!
سنله نه لر یاشامیشام دونیادا!!!
خیالیمین پنجره سی سن اولدون
اؤره گیمین بیر لال سسی سن اولدون
بو عؤمرومون کور هوسی سن اولدون
سنله نه لر یاشامیشام دونیادا!!!
کؤنول قانین ایچیب–قوسان سن اولدون
من سوچ سوزو داردان آسان سن اولدون
هم سِئوینن هم ده کوسَن سن اولدون
سنله نه لر یاشامیشام دونیادا!!!
گاه آغلادیق - گاهدا گولدوک برابر
گاه سئویندیک - گاه اوزولدوک برابر
هارالاردان بورا گلدیک برابر
سنله نه لر یاشامیشام دونیادا!!!
یونس کریمی
سوچ:گناه دالغا:موج
مزاریم اوستونَه گلمَه بیر داها
یانوندا اولارکن آز اینجیت می سن؟؟
توُخونما قبریمین داشینا بئله
باری! قوُی بورادا راحات اویوم من
الوندَه ن اوچان قوش بیر داها دؤنمَه ز
اوخشویوب سیزلاما ، آغیت سؤیلَه مَه
آچیلماز اوزونه بو داش قاپیم دای
گؤزووون یاشلارین بوشا اَله مَه
قفسدَه ن بیر سارای تیکمیشدین مَنَهَ
کؤنلومون قوشونو سالمیشدین تورا
سیخمیشدون جانیمی قیزیل قفسدَه
قلبیمین حیسسی نی چکمیشدین دارا
دیری کَن قدریمی بیلمَه دین ، ایندی
چیرپیرسان باشووو قَبیر داشیما ؟ !!!
ابدی یوخویا گِئدَه ن دورانمَز
دونیانین تُورپاغین تؤکسؤن باشونا
یونس کریمی
