سنیدین - سنیدین گؤزه ل سئوگیلیم!!
عؤمرومون بولودسوز - دومانسئز یازئ
قارانلئق گئجه مین پارلاق اولدوزو
آغزئمئن دادئنئن بیر پارچا دوزو
سنیدین - سنیدین گؤزه ل سئوگیلیم!!
آغاران گؤزومون قارا گیله سی
سئودامئن یئخئلماز اومید قالاسئ
کدرلی باغرئمئن هرآن هوسی
سنیدین- سنیدین گؤزه ل سئوگیلیم!!
چنلی یوللارئمئن ائشئغئ - نورو
سئوگی اوجاغئمئن آلووو - قورو
تانرئنئن گؤزونون یاشئندان دورو
سنیدین - سنیدین گؤزه ل سئوگیلیم!!
دونیامئن بزه گی ، باشئمئن تاجئ
چاراسئز دردیمین سون بیر علاجئ
دویقومون قانادئ ، فیکریمین گوجو
سنیدین-سنیدین گؤزه ل سئوگیلیم!!
خیلقتین سئویملی گؤیچک ملگی
آرزولار باغئمئن گولو - چیچگی
بو یوخسول کؤنلومون تک جه ایستگی
سنیدین - سنیدین گؤزه ل سئوگیلیم!!
یونس کریمی
برچسبها: شعر ترکی, اشعار ترکی, یونس کریمی, تورکو شعر
